Shepard Tone
სანამ დავიწყებ, თუ გაქვს თავისუფალი 11 წამი, ჩართე და მოისმინე ჩანაწერი, რომ დამთავრდება კიდევ ერთხელ ჩართე.
ამ აუდიო ილუზიას Shepard Tone ჰქვია, და ძალიან ხშირად იყენებენ ფილმებში მოლოდინის შესაქმნელად და დაძაბული მომენტების კიდევ უფრო გასამძაფრებლად.
რა ქმნის ამ შეგრძნებას?
სერია ხმებისა, რომლებიც ერთი ოქტავით არიან დაშორებულნი ერთმანეთისგან
და როცა ზედა ოქტავის სიმძლავრე იკლებს, პარალელურად იზრდება ქვედა ოქტავის სიმძლავრე
შენიშვნა: ეს მარტივად აღსაქმელი რომ ყოფილიყო იმიტომ გაჩვენე, Piano Roll - ში ნოტების ასე ჩაწერით ვერ მიიღებ შედეგს, რადგან ნოტი შემდეგ ნოტზე გადასვლისას ერთი სიხშირიდან მეორეზე ხტება, ჩვენ გვჭირდება რომ ერთი ოქტავიდან შემდეგ ოქტავამდე ყველა სიხშირე გაჟღერდეს.
ერთადერთი სირთულე რაც Shepard Tone - ის შექმნას თან ახლავს (ისიც იმ შემთხვევაში თუ ინსტრუმენტით და მასზე მიბმული ბევრი LFO - ებით არ აკეთებ) არის მიღებული აუდიო ფაილის ერთმანეთზე შეუმჩნევლად გადაბმა...
დავიწყოთ ინსტრუმენტის შერჩევით, ჩემს შემთხვევაში Operator - ი ყველაზე კარგი ვარიანტია.
ვქმნით Midi Clip - ს
Win: Ctrl + Shift + M
Mac: CMD +Shift + M
ვიღებთ ნოტს (კი, რა თქმა უნდა შეგიძლია ნებისმიერი ნოტი აიღო, რა კითხვებს სვამ…)
გადავდივართ ოპერატორის ბოლო სექციაში და Pitch - ში ვწერთ 12 - ს
Pitch Bend - ში 12 - ი მივუთითეთ იმიტომ, რომ მოდულაციას, (რასაც ახლა გავაკეთებთ) გვჭირდება რომ უმაღლეს წერტილად ის ნოტი მიაჩნდეს ოღონდ 1 ოქტავით მაღლა, რომელიც წეღან ჩავწერეთ.
მაგალითად, თუ წეღან აიღე ნოტი C5 და Pitch Bend - ში მიუთითე 12, Pitch Bend - ის ბოლომდე აწევისას მიიღებ C6 - ს და ა.შ
შევდივართ Envelope - ში და ვირჩევთ MIDI Ctrl > Pitch Bend
ვსვამთ ორ წერტილს და მარჯვენას ვწევთ ბოლომდე.
ვაკოპირებთ არხს სამჯერ
საბოლოო ჯამში მივიღებთ 4 იდენტურ არხს. პირველ არხს ვტოვებთ როგორც არის, დანარჩენ სამში შევდივართ და ვცვლით ოქტავებს.
მეორე არხი C5 - დან ჩამოგვაქვს C4 - ზე
მესამე არხი C5 - დან ჩამოგვაქვს C3 - ზე
მეოთხე არხი C5 - დან ჩამოგვაქვს C2 - ზე
კლიპს, რომელიც პირველ არხზე დევს, ავტომაციით დავუწევთ ბოლოსკენ
კლიპს, რომელიც ბოლო არხზე დევს, ავტომაციით ავუწევთ ბოლოსკენ.
მიღებული შედეგი რომ გადაწერო ახალ აუდიო არხზე (Resampling, Routing & I/O) და გადამრავლების შემდეგ ერთმანეთს სწორად დაამთხვიო, მიიღებ ფაილს, რომელიც ქმნის ილუზიას თითქოს დაუსრულებლად ზემოთ მიდის.
ვიწერთ ყველაფერს ერთ არხზე
ვცდილობთ გადავაბათ რამდენჯერაც გვინდა ისე, რომ გადაბმა არ შეეტყოს
შედეგი:
ამ ფაილში ორჯერ არის გადაბმული ჩანაწერი, და თუ ყველაფერი სწორად გავაკეთე, გადაბმის ადგილს ვერ შეამჩნევ.
